सप्रेम नमस्कार विनंती विशेष.....

धनंजय आणि चंद्रकांत दिवाळी अंक प्रसिद्ध करण्याआधीपासूनची धांदल काय आणि कशी असते, हे काही वेगळं सांगायची गरज नाही. लेखक, त्यांच्या कथा – कादंबर्याे घेताना, त्यांच्याशी भावबंध कायम राखताना, जाहिरातदार मिळवताना, आलेला मजकूर टाईप करण्यासाठी पाठवताना, त्याची प्रुफं एकत्रित करताना ते अगदी प्रत्यक्ष अंक दिवाळीच्या आधी बाजारात कसा येईल, यासाठी दिवसरात्र एक करताना मित्रहो, साथ असते ती तुमच्या शब्दांची! वेळोवेळी तुम्ही केलेल्या सूचनांची, कौतुकाची, आवर्जून दिलेल्या पोचपावतीची! तुमचे शब्द, त्यातल्या प्रत्यक्षाप्रत्यक्ष भावना आमचा हौसला वाढवतात आणि जबाबदारीचं भानही. मागील अंकापेक्षा यंदाचा अंक अधिक चांगला निघावा, यासाठी आमच्या प्रयत्नांमागे असते ती तुमची बोलकी तर कधी नि:शब्द साथ! त्याच्याच बळावर हे अवघड शिवधनुष्य पेलण्याचं बळ आम्हाला येतं. खरं सांगतो मंडळी, माझे वडील श्री. शंकरराव कुळकर्णी हे अंक काढत असताना काय अग्निदिव्यातून जात असतील, याची प्रचिती हा अंक अनेकांच्या शुभेच्छांच्या बळावर आणि अण्णांच्या पूर्वपुण्याईवर आम्ही चालवायला घेतला तेव्हा लक्षात आलं. शेवटी अण्णांची जिद्द, संयमीपणा, लोकसंग्रहाची वृत्ती आणि उत्तम तेच देण्याचा आग्रह आम्हीही कायम ठेवत इथवरची मजल गाठली आहे. हे मन्मनीचं सांगण्याचं कारण म्हणजे मला या ठिकाणी काही वाचकांच्या पत्रांचा उदाहरणादाखल नक्कीच परिचय तुम्हालाही करून द्यावासा वाटतो. आज अत्याधुनिक तंत्रज्ञानाने जग खूप जवळ येत चाललं आहे. लिखित पत्रांचा जमाना तसा राहिलेला नाही. मात्र, आपल्या महाराष्ट्रात आजही असे काही भाग आहेत की, जिथे ह्या सुविधा अद्यापही पोचलेल्या नाहीत. धनंजय, चंद्रकांत मात्र तिथेही पोचलेत, हे विशेष. अशा ठिकाणांहूनही चोखंदळ वाचकांची आम्हाला आवर्जून पत्र येतात. कथा, कादंबरी आवडल्याची तर कधी मुखपृष्ठ आवडलं असं सांगणारी रसिक पत्रं देखील हुरूप वाढवून जातात. कधी पोस्टकार्ड तर कधी भलीमोठी पत्रं, आंतर्देशीय तर कधी केवळ फोनवर आपली प्रतिक्रिया देणारी अशी नाना तर्हेडची वाचक मंडळी आमच्या या परिवारात सामील होत गेली. आणि हा आमचा गोतावळा आज मागे वळून पाहताना नक्कीच गहिवरून येतं. एका ध्येयाने पछाडल्यागत हे अंक प्रसिद्ध करीत आलो, उत्तमोत्तम लेखकांची, चित्रकारांची तेवढीच तोलामोलाची साथ आम्हाला लाभली. हे सारं येत्या २८ ऑगस्ट रोजी “निवडक धनंजय”च्या निमित्ताने पुन्हा एकवार समोर साक्षात होईल आणि पुढच्या वाटचालीकरता ते नक्कीच आपणां सर्वांसाठी प्रेरक ठरेल, हिच सदिच्छा...
आपला नम्र, राजेंद्र शंकरराव कुळकर्णी.